عمر عصام يسخر من وكيل BMW.. ندعي ربنا للناس اللي ما استلمتش

جلوبال أوتو وكيل BMW صورة أرشيفية

علق خبير سوق السيارات عمر عصام على رفع وكيل جلوبال أوتو وكيل BMW في مصر للأسعار بشكل متكرر في ظل تأخير تسليم السيارات للحاجزين عبر صفحته الشخصية على موقع الفيسبوك.

جلوبال أوتو ترفع أسعار BMW

وقال عصام في المنشور الصادر منه على صفحته الشخصية: زيادات BMW الجديدة للمرة العشرومية .. والناس الحاجزين مرعوبين جدا، تخيلوا كده حضرتك بتحجز عربية برقم معين.. ويعدي عليك ٧ شهور فقط … وتلاقي ثمن العربية زاد الضعف وحضرتك لسة مستلمتش !!!!

وأكمل: ومش عارف حتى كشخص حاجز من زمان تأخذ قرار تسحب فلوس الحجز ولا لأ .. علشان العطلة الرهيبة ديه، والخسارة اللي هتتحملها لما تفكر تشتري عربية تانية بعد ما انتظرت ٧ شهور وحصلت زيادات رهيبة في كل موديلات السيارات !!

الغانم وكيل BMW لم يلتزم بتعهده للعملاء

 وتابع في المنشور الصادر تعليقا على رفع مجموعة الغانم المشارك الرئيسي في مجموعة جلوبال أوتو وكيل BMW في مصر: هديلكم مثال .. الناس اللي كانت حاجزة BMW 320i من ٧ شهور بقيمة 1.5 مليون فأقل .. بناء على الوعود من وكيل جديد بالتسليم السريع وهكذا؛ النهاردة نفس القيمة ديه ممكن بالعافية تركبهم تويوتا كورولا الفئة قبل الأخيرة !!

واستطرد: دلوقتي لو الوكيل كلمهم تقريبا هيدفعوا ضعف ثمن العربية .. ده (( لو )) كلمهم اليومين دول،  أنا لا ألوم طبعا الناس الحاجزين ( كان عندهم أمل في روح جديدة ومنهج مختلف مع وكيل لسة جاي من برة مصر ) .. ولكن بصراحة كده مفيش حاجة سالكة في مجال السيارات ( إلا من رحم ربي ) ..ديه كلمة حق اتحاسب عليها قدام ربنا ..

وسخر في نهاية المنشور من نهج الوكيل في مصر:  المهم ندعي ربنا للناس اللي حاجزة ولسة مستلموش عربياتهم .. يستلموا قبل ما عربياتهم تعدي ال 10.000.000 جنيه.

منشور عمر عصام ساخرا من وكيل BMW